Nyika Ine Vanhu Vakawanda

GUEST POET: BRIAN KAZUNGU

Chokwadi tingati here makawanda, kana paine vanoti vakafamba imi mese munohwanda

Tingati here makawanda, kana paine vanoti vakataura nyangwe chakaipa hapana anoramba

Chokwadi munganzi here makawanda kana paine vanokudyirai mugove wezvese zvamakashanda

Aiwa, kana vazhinji munyika vari zvimbwasungata zvevamwe, hatingamboti makawanda

Nyangwe vari vashoma, nyika inonzi ine vanhu vakawanda kana pamwechete vaine chavanovaka

Asi tinoti ine vanhu vashoma, kana nyika izere vanotambudzana kusvika pakuparadza zvakavakwa

Nyika inonzi ine vanhu vakawanda, kana ivo vachibatana pakuita zvinhu zvakanaka

Asi tinoti ine vanhu vashoma, kana iine zviuru ne zviuru zvinotadzisa vamwe kugara zvakanaka

Kana vanhu vazhinji munyika vachigara vari mimvuri yevamwe, ivavo tinovatora se sevasipo

Iko kufambidzana ne vanhu vasipo muhupenyu hwavo pachavo, kunotosvora maziso se sipo

Nokuti kwese kwamaenda vanoswero kudzimaidzai, mukashaya chabuda kunge musina kana zvipo

Tinoti nyika ine vanhu vakawanda, nyangwe iine vashoma, kana mumwe nemumwe pachake aripo

Tinoti ine vanhu vakawanda, nyika yekuti uyo ne uyo ndiye hake pachake nyangwe paanofamba

Nyangwe vari zana revanhu, vakatowanda kudarika zviuru zvevane pfungwa dzakapambwa

Tinoti ine vanhu vakawanda nyika kana mumwe nemumwe wavo ari iye hake zvake pachake

Asi vanenge vari vashoma muuzhinji hwavo kana uyo ne uyo asimo muhupenyu hwake pachake

Hatingamboti nyika ine vanhu vakawanda, kana huzhinji hwavo husina zvahunoshanda

Kuti tiverengedze uyo ne uyo vanehuvepo hwakamedzwa nevamwe, kwatiri zvaramba

Zviri nani kufamba zvishoma zvishoma sa kamba asi iwe uchienda kwako kwawakananga

Pane kuchimbidza kufambidzana ne uyo akakupamba pfungwa asi iye musango achinokukanda

Haupo muhupenyu hwako pachako, kana uchingoraramira vamwe vausingatozive kwavakananga

Hatingambokuverenga paruzhinji rwevanhu, kana kuva iwe pachako muhupenyu hwako zvichiramba

Ukawana chako chaunoita chinonzi ichi ndechake, hazvireve kuti mavakuita mazvake mazvake

Asi zvinoreva kuti newewo uri munhu anoverengwawo panevamwe munyika ine vanhu vakawanda